Ababaka abava mu bitundu ebitagenda kufuna buyambi bwa Covid beemulugunya
Ababaka ba Palamenti abava mu bitundu ebitagenda kufuna ku ssente gavumenti zeetegese okuwa abawejjere mu kiseera kino eky’omuggalo bavuddeyo ne beemulugunya ku nkola gavumenti kwe yasinzidde okulondamu abanaafuna ssente kye bayise okulaga obusosoze.
Okuva ku kkono; John Paul Mpalanyi, Charles Tebandeke ne Geoffrey Lutaaya mu lukiiko lwa bannamawulre.
Bya Lawrence Kizito
Ababaka ba Palamenti abava mu bitundu ebitagenda kufuna ku ssente gavumenti zeetegese okuwa abawejjere mu kiseera kino eky’omuggalo bavuddeyo ne beemulugunya ku nkola gavumenti kwe yasinzidde okulondamu abanaafuna ssente kye bayise okulaga obusosoze.
Lutaaya Babaka Mmere
Ababaka nga bali mu lukiiko ku Pope Paul mu Ndeeba.
Bino ababaka babyogeredde mu lukiiko lwa Bannamawulire lwe batuuzizza ku wooteeri ya Pope Paul mu Ndeeba leero ku Lwokutaano nga June 25,2021.
Bagamba nti bandisoose kubeebuuzaako nabo ne bawaayo ebirowoozo byabwe ku nsonga z’abantu abali obubi mu bitundu byabwe. Okusinziira ku byasaliddwaawo akakiiko k’eggwanga akaateekebwawo okulwanyisa obulwadde bwa Covid 19 mu ggwanga, abawejjere abali mu bibuga 10 ne Munisipaali 41 be bagenda okuganyulwa mu nteekateeka eno.
Geoffrey Lutaaya (Kakuuto)
Agamba nti abantu be abamu tebakyakola n’addala ababeera ku myalo okuli Minziiro, Kasensero, Kiyebe olw’amazzi agaasalako ebitundu byabwe nga tebalina ntambula ebasobozesa kukola bizinensi n’abantu abali ku lukalu.
Agamba nti bano beetaaga obuyambi mu bwangu. Awadde amagezi nti bwe kiba kisoboka Pulojekiti za Gavumenti ezimu okugeza enguudo zigira nga ziyimirira ssente zisooke ziyambe abanaku okufuna ekyokulya kubanga bulijjo babadde bawa omusolo.
John Paul Mpalanyi (Kyotera)
Agambye nti ekitundu kyakiikirira kye kimu ku bitundu ebyalwawo okuva mu muggalo ogwasooka kubanga kiriraanye ensalo, ekintu ekyanyiga ennyo abantu be naddala mu by’enfuna.
E Kyotera nayo waliyo amasomero ng’abasomesa mu kiseera kino tebalina kyakulya ate nga tebasuubira kuggulwawo mu bwangu. Agamba nti okuleka emabega abantu nga bano buba busosoze. Asabye Ofiisi ya Katikkiro okuddamu okwetegereza ensonga eno, n’okwebuuza ku babaka.
Charles Tebandeke (Bbaale)
Gavumenti yandibadde etunuulira emirimu egyasinga okukosebwa ennyo obulwadde bwa Covid 19, n’eyamba abantu abaali bagikola nga tefudde ku bitundu gye bava.
Awadde eky’okulabirako nti e Bbaale gyakiikirira waliyo amasomero g’obwannannyini 400. Buli ssomero lirimu abasomesa abatakka wansi wa 10. Mu kiseera kino bano balaajana olwobutaba na mmere nga kiba kikyamu okubaleka emabega.
Ababaka abalala okuli Hellen Nakimuli (mukazi/Kalangala), Stephen Sserubuula (Lugazi Munisipaali), Godfrey Kayemba Solo (Bukomansimbi South), nabo basabye enteekateeka eno eddemu yeetegerezebwe abantu baabwe baleme kulekebwa mabega.