Muntu asabye abalonzi okukomya okukyamuukirira nga balonda abakulembeze

GEN.Gregory Mugisha Muntu akwatidde ekibiina kya ANT bendera ku bwapulezidenti asaggudde akalulu mu disitulikiti y'e Ntungamo gy'asibuka n'alabula abalonzi okukomya okulondanga abakulembeze abaluvu olw'okukyamuukirira.

Muntu asinzidde mu tawuni kkanso y'e Rwamabondo n'alaga okutya olw'abantu abasusse okulonda abakulembeze abaluvu olw'okukyamuukirira ky'agambye nti kizing’amizza nnyo enkulaakulana y'eggwanga.

E Ntungamo Muntu alabudde abatuuze obutamulonda ku bwapulezidenti olw'okubanga mwana nzaalwa ya mu kitundu wabula bamulonde olw'obusobozi n'obumanyirivu bw'alina okukulembera eggwanga.

Muntu agambye nti kyabulabe nnyo abantu okulonda abakulembeze abeeyagaliza be yagambye nti babba ssente z'eggwanga ekivaako ebizibu ebisuza abantu nga bakukunadde omuli ; ebbula ly'eddagala mu malwaliro, enguudo embi n'ebirala.

Wano Muntu awabudde bannayuganda okutunula enkaliriza mu kalulu kano balonde abakulembeze abanaasobola okubakolera ku nsonga ezibanyigiriza.

Abantu b'e Kagarama beekokkodde enguzi essusse mu ggwanga ensangi zino gye bagambye nti y'esinze okuzing’amya ne bamusaba nti bw'akwata obuyinza alwanyise enguzi bafune obuweereza.

Ku nsonga y'enguzi Gen.Muntu,agambye nti obunafu businze kuva ku bakulembeze abasusse okwagala Ssente n'alabula Bannayuganda okwewala okulonda abakulembeze abajja okubatundako ensi yaabwe olw'okweyagaliza.

Bo abalimi n'abalunzi e Rwamabondo balaajanidde Gen.Muntu ku mbeera y'obwavu mwe bawangaalira n'abagumya nti gavumenti ye yaakussa essira ku by'Obwegassi okulabanga ebadduukira okweggya mu bwavu.