Chamilli akutudde ddiiru ne Pulezidenti wa Burundi

JOSE Chameleone akutudde ddiiru ne Pulezidenti wa Burundi n’asekerera abamuvuganya “n’abagamba, bino bya banene”.

Chameleone ng’amannya ge amatuufu ye Joseph Mayanja yayitiddwa nga omugenyi ow’enjawulo ku mukolo gw’abavubuka ‘Champion of African Youth’ ogwabadde mu Burundi ku Ssande era ono yakosezezza omukisa guno okubuulirira n’okusomesa abavubuka ku kwekulaakulaanya nga beeyambisa ebitone byabwe.

Pulezidenti Ndayishimiye Mu Kafubo Ne Chameleon

Ng’omukolo guwedde, enkeera, Pulezidenti Evariste Ndayishimiye yakyazizza Chameleone mu maka ge aga Ntare Rushatsi House ne beevumba akafubo akaakulungudde obudde obuwera nga banyumyamu n’okwogerezeganya ku ngeri gy’ayinza okuyamba mu abavubuka mu ggwanga lino.

Chameleone yamwanjulidde pulojekiti eziwerako wabula essira yalitadde ku kuteekawo sityudiyo ey’omulembe eya nga Ultramodern Studio eyambe ku bayimbi baayo. Pulezidenti Ndayishimiye yalabise ng’asanyukidde enteekateeka
eno era ono yamusuubizza okumuwagira mu pulojekiti eno.

Chameleone eyawerekeddwaako maneja we akola ku nsonga z’ebweru w’eggwanga, Fred Zinki Kinene, yategeezezza nti ensisinkano gye yabaddemu ne pulezidenti wa Burundi yaakumuyamba okutuukiriza ekirooto kye eky’okutumbula myuziki mu buvanjuba bwa Afirika.